旅遊鍾人

食人情味

揾食,是旅遊樂趣之一,甚至係主體。對於食,我惟一要求係冇或者少味精,啱自己口味那便是「正菜」,是否米芝蓮是否六星酒店,真的冇乜所謂。至於食「環境」氣氛或氣派那是另一回事。

那回人在葡萄牙 Porto,周街行游吓游吓入到小巷見到個「燒豬招牌」,被它吸引進內望望。毫不起眼的地道小店看來有點亂,食客全是本地人,外來人只有來自香港的我倆,也是全場至後生者。小店貼上溫馨提示寫著 : 「每週只二及四有燒豬賣」,這天剛好趕上,誰知老板說 : 「賣嗮了,只剩燒豬頭。」不過好客的老板話仲有隻細肶私伙嘅,就醒你哋啦。賣剩豬頭?照殺! 

嘩!香口到吖......比起前一日那間外賣專門店更正且非常平民貼地價錢,個薯仔湯殺死人咁好味,整多兩件馬介休,一碟炸沙甸魚仔,全無味精口感、真材實料,我呢餐埋單 15歐/二人,食「人情味加風情」便已回本。

對上一餐的泰國清邁平民火煱,同樣閑時百無聊賴遊蕩橫街弄巷,同樣被一醒目招牌吸引眼球:「99銖任食火鍋」(即25港幣任食),同樣旨在八卦進內望望乜料,本來沒有幫襯之意。咦!個場乾淨企理喎,可别問有乜好料選擇(實在不多),但食材看似新鲜,總之任食,一定飽肚。才99銖,本著被搵笨心態一於試試,勿論好與壞都有話題。

全場盡是年輕本土人,大都有規有矩食相斯文不粗魯(呢個國家有前途),另加一檯cheap cheap鬼仔背囊黨,及我呢檯香港 Cheap友。

以99銖計,呢餐絕對超值無投訴,埋單時太子女話我「考令佬」似成龍,埋單仲畀個折扣,雖則好細條數,但我已被冧死。

呢餐其實係食「清邁人情味」,多點體會地道民風民情,這就叫做旅行。